KONOSÉ BO MES TA KONOSÉ BO SER REAL


Nos a weta e mandato di konosé Bo mes for di boka di nos mayornan, dosentenan i lidernan spiritual. Durante di orashon nos a drenta den e esfera di nos alma i nos a kontempla e misterio di bida. I nos a komprondé ku nos mester sigui e mandatonan di Dios ku ta reflehá deb Eskrituranan Sagrado di Ost i Wèst.

Semper kada un di nos a kumpli ku eseinan? Den mi kontemplashon en kuantu di mi mes komportashon mi a yega na e konklushon ku mi por a duna mas amor i a base di e amor ei mas guia, tin bes na un manera suave i tin bes ku outoridat di un ku a weta e Lus Interno pa medio di introspekshon i lesa dokumentonan ku ta duna Sabiduria, Forsa i Beyesa. Na e momentunan ei mi a primintí na e aspekto di Dios ku ta biba den mi i den nos tur, di ekspresá mas amor i duna mas guia. No guia solamente na un manera rasional, pero tambe un tipo di guia ku ta aserka e idea di e Angel Guardian

Dor di ku ami ta kere hopi den kontemplashon ku wowo sera, mi ke duna mi kontribushon awe pa medio di dos ehersisio. E promé ta tuma 5 minüt. E di dos ta tuma mas òf ménos 15 minüt.

E promé fase ta konsistí di ku Bo ta sera Bo wowo riba un señal di mi. Na momentu ku nos tin nos wowo sera, mi lo guia e kontemplashon ku sierto pregunta ku kada un lo mester hasi na su mes.
E preguntanan no tin komo meta pa Bo sinti kulpabilidat, pero si un konosementu profundo ku ta solamente posibel den Presensia di Bo guia spiritual. Mi ta ripití: un konosementu profundo ku ta solamente posibel den Presensia di Bo guia spiritual.

EHERSISIO l
Sera Bo wowonan. Sinta relahá, wak Bo rosea. Djis wak kon Bo rosea ta. Sinti Bo mes den
presensia di Bo Guia Interior..

Bo a weta semper e Presensia di Dios den e otro persona?
Si e kontesta ta si, kua ta e kualidatnan ku a yuda Bo den esei.
Si ta no, kiko Bo mester hasi pa logra esei.

Bo a weta un progreso den Bo manera di ekspresá Amor fraternal ounke Bo ta wetando den sierto Ruman te ainda e mesun Personalidat Brutu for di momentu ku Bo a konosé nan?
Si e kontesta ta si, kua ta e kualidatnan ku a yuda Bo den esei.
Si ta no, kiko Bo mester hasi pa logra esei.

POUSA

EHERSISIO 2
Promé ku mi kuminsá ku e di dos ehersisio mi mester duna un splikashon di e tipologia ku Skol di Sikologia Transpersonal di Kalifornia a forma pa trata personanan ku problemanan sikológiko i spiritual. E tipologia ei a bira punto di salida di e tayernan konosí komo “E Mucha den nos”
Skol di Sikologia Transpersonal di Kalifornia ta dividí e ser humano den 3 aspekto: a) e mucha den nos b) e adulto den nos c) e mayor den nos.
Despues di tempu a bin otro koriente di pensamentu ku ta duna un divishon ku ta kuadra mas ku e pensamentu místiko di Ost i West, esta:
a) e mucha den nos b) e adulto den nos c) e Ser Interior den nos.

E mucha den nos ta bin dilanti na momentu ku nos na un manera kla ta eksihí atenshon, amor, responsabilidat, guia. E ta e parti instintivo -natural den nos. I ta masha kaprichoso i intransigente.

E adulto den nos ta un nivel mas aya di e mucha unda instinto no ta hunga un ròl asina grandi mas a base di sierto konseptonan sosial – kultural kua keda atkiri dor di ambiente i/ of disposishon ètniko i/ òf síkliko. E aspekto aki den nos ta DUNA atenshon, amor, responsabilidat, guia kisas no na un kalidat di kita sombré, pero tin e kuido nesesario.

E Ser Interior ku ta e nivel divino den nos TA atenshon total, amor puru, pues inkondishonal, responsabilidat na e manera optimal.

Tin muchu mas aspekto di e sikologia aki ku mi por trese dilanti, pero mi ta limitá mi mes na e lokual ta nesesario pa e siguiente ehersisio.

Kon e tipologia aki ta yuda nos pa komprendé e piedra brutu den e otro Ruman –pues e parti di dje ku ta eksihí pa aksept’é meskos ku e ta ku tur su defektonan miéntras nos ke pa weta kualidatnan otro manifestá dor di dje ku ta indiká ku en bèrdat e ta den un proseso di transformashon?

Dor di toleransia. Si, dor di toleransia. Toleransia ta amor, kisas no amor kondishonal, pero e ta un fase di amor. Toleransia ke men ku nos a suich na e nivel di e adulto òf Ser Interior den nos, pues na e esfera ku sa parsialmente òf totalmente ku amor semper ta vensedó.

Promé ku mi pasa pa hasi e siguiente ehersisio mi ke bisa ku si tin un pleitu entre dos persona i ningun di nos dos ta kapas di bai maske pa un ratu na e nivel di e adulto òf mas ariba, e ora ei tin distanshamentu, bringamentu, diborsio etc.

Mi ke duna Boso un ehersisio for di un di mi tayernan di “E Mucha Interior”. Pa esei mi ke pa Bo konsiderá e tres nivelnan:
Mucha/ Adulto/ Ser Interior.

Lider di e ehersisio ta bisa kada persona segun e órden den kua nan ta sinta ku nan ta un sierto number. (E tin un papel kla ku e nòmbernan i e ta skirbi e number tras di kada persona.)
For di un makutu V.M. ta saka un kantidat di papel (igual na mitar di esunnan presente) un pa un i nan ta keda menshoná dor di Orador. Esun na kua e number ta korespondé ta kue su stul i ta pone esei den e parti paden di e kolumnanan di nort i sùit. Despues kada un ta skohe un papel i e lider di grupo ta bisa e persona korespondiente pa bin sinta dilanti di e otro persona. Despues e ehersisio ta kuminsá.Interkambio non -verbal i energétiko entre 2 R..

Ehersisio 2

Riba un papel di flip over e ta mustra ku kada un ta sintonisá riba e Mucha den dje (nivel 1) i despues di haña un siñal vokal e for di nivel 1 ta sintonisá riba e adulto den e otro persona dilanti di dje (nivel 2).

¯
Sera Bo wowonan. Sinta relahá, wak Bo rosea. Djis wak kon Bo rosea ta. Sintonisá riba e Mucha den Bo. ................... Awor laga e Mucha den Bo sintonisá riba e adulto den e otro sinta dilanti di Bo. (kada un di e diferente duonan ta hasi esei)

Despues di algun minüt. Abri Bo wowonan trankilamente i no move muchu.

Tin yen ehersisio ku nos por hasi. Pero mi ke hasi esun di mas elevá ku nos por hasi awor aki. Denter di un ratu Bo mester kuminsá sintonisá riba e parti di e Ser Real, e parti Divino den Bo i despues Bo ta duna e Amor Fraternal inkondishonalmente na e Mucha i e Adulto den e otro.

¯
Sera Bo wowonan. Sinta relahá, wak Bo rosea. Djis wak kon Bo rosea ta. Sintonisá riba e Ser Real den Bo. ................... Awor laga Bo Amor bai na e adulto i e mucha den e otro sinta dilanti di Bo.


H.Schotte
Adaptashon di un lektura presenta den
Kompareshon di 20-11-2007