RELAXATION/ RELAHASHON

RELAHASHON

Esaki ta dediká na tur esnan ku a pidimi pa skirbi algu tokante di relahashon. Tin di nan a hasi kurso di Metafísika serka mi òf hatha yoga, Reiki i "Inner Child".

Kada momentu ku Bo ta sinti kansa Bo ta buska un momentu di hasi nada (tira un kabes/ bai lèg/ bai drumi) den kaso di kansansio físiko òf un momentu pa hasi un kos totalmente diferente den kaso di kansansio mental.

Nos ta satisfecho ku e solushonnan ei te ku nos ripará ku nos ta sigui sinti kansansio ounke nos a apliká mas seshon di no hasi nada òf hasi sierto kos ku pa basta tempu nos no a hasi p.e. bai landa, bai kana ètc. Hasta nos ta yega na e konklushon ku den e momentunan di no hasi nada en realidat nos a keda prokupá tokante di tur sorto di kos. I alfin nos ta bin komprondé :Mi no ta relahá bon. Mi no ta aplikando un relahashon berdadero òf kompletu.

I ehèmpelnan di personanan ku a haña atake di kurason òf di serebro dor di a rabiá i kai den depreshon a alertá nos i ta hiba nos na e desishon di buska mas aleu. Nos ta kuminsá sigui kurso di relahashon òf di hatha yoga (e yoga ku ta pone enfasis riba ehersisio korporal i di respirashon).

Pa tur esunnan ku a pidi mi pa skirbi algu di relahashon, mi ke sugeri lo siguiente:

-Buska un luga trankilu

- I un momentu ku ningun hende no por stroba Bo.

-Pone musika di New Age (tin yen ku Bo por baha for di Internet)

-Sinta riba un stul òf bai drumi riba flur riba un kléchi òf sèrbètè.

Hala rosea profundu 3 bes.

-Laga Bo pensamentunan ta dirigí riba Bo kurpa.

-Despues sirigí Bo pensamentu pa mas o menos un minüt riba diferente parti di Bo kurpa: Bo dos pianan(voeten); Bo ènkelnan; e parti di Bo pia entre ènkel i rudia; Bo rudianan; Bo 2 bèlnan di pia; Bo barika; Bo partinan seksual; Bo stoma i tripanan (Bo sa ku e tripanan por ta entre 6 te 9 meter?); Bo higra na banda drechi ku e galblas bou di dje; Bo pankreas i Bo milt klier; Bo nirnan; Bo diafragma; Bo pulmonnan; Bo kurason; Bo skoudernan; glij bai ku Bo atenshon via kada un di e brasanan na Bo mannan; Bo pòlsnan; e parti entre pòls i kokoti; Bo brasa parti ariba; atrobe Bo skoudernan pa algun sekònde; glij bai na parti abou di Bo lomba te e parti di sinta; i bin poko poko ariba konsiderando ku Bo lomba tin masha muskulo mes pa deskansá, no lubidá e kolumna vertebral; Bo garganta ku tantu e esofago ku ta bai na Bo stoma i Bo tubo di hala rosea; Bo kabes pa algun sekònde i despues e partinan di kabes: e boka ku lenga, djente, paladar; e nanishi, e oreanan, e wowonan, Bo serebro.

Gosa di e silensio mental (porfin e boroto mental di yen preokupashon a disparsé) pa algun minüt i abri Bo wowonan.

Esaki no ta un huida for di responsabilidatnan, pero un teknika pa despues por kumpli mihó ku nan.

Relahashon ta sirbi pa:
-sosegá i drumi mihó

-pa dominá e emoshonnan i pashonnan
-pa hasi mihó kontakto ku e presensia di Dios den Bo (e ta por sierto un "sine qua non" pa haña kontakto ku Dios)

-pa kreá un ekilibrio sikologiko

Ku aparatonan "bio feedback' Bo por aberiguá si Bo ta relahá bon.

Relahashon por keda fortifiká pa medio di visualisashon, pero e tema di visualisashon meresé un pagina apart.

Promé mi finalisá mi mester bisa ku tin un gran diferensia entre preokupá tokante di kosnan i planeá;:esun ta boroto mental i e otro ta imaginashon kreativo.